Постарите луѓе кои не можат во одредена положба да стојат повеќе од 10 секунди имаат двојно поголем ризик од прерана смрт, пишува БМЈ.

Учесниците во истражувањето имале задача да направат едноставна вежба која подразбира кревање на едната нога со истовремено држење на двете раце покрај телото, а оние кои не можеле да ја задржат оваа положба најмалку 10 секунди имале 84 отсто поголеми шанси за смрт од оние кои можеле, пишува БМЈ за студијата објавена во „Бритиш журнал оф спортс медисин“ (British Journal of Sports Medicine).

Неможноста да се застане на една нога 10 секунди е поврзана со удвојување на ризикот од смрт.

Причината за тешкотиите во одржувањето на рамнотежата може да биде губењето на мускулите, што ги става постарите луѓе во зголемен ризик од паѓање. Следствено на тоа, луѓето постари од 70 години имаат најмногу проблеми со рамнотежата.

„Нашето истражување покажува дека неможноста да се заврши овој тест од 10 секунди кај постарите учесници е поврзано со поголемиот ризик од смртност и пократкиот животен век“, пишуваат тие.

Истражувачите проучувале 1.702 мажи и жени на возраст од 51 до 75 години. Од нив, 348 не можеле успешно да стојат на една нога 10 секунди, главно постари од 70 години и оние кои имале вишок килограми или дијабетес.

Повеќе од половина (околу 54 отсто) од оние на возраст од 71 до 75 години не можеле да го завршат тестот. Со други зборови, луѓето во оваа возрасна група имале повеќе од 11 пати поголеми шанси да паднат на тестот отколку оние кои се само 20 години помлади.

Како што наведува студијата, оние кои паднале на тестот имале генерално полошо здравје: поголем процент биле дебели и/или имале срцеви болести, висок крвен притисок и нездрави масти во крвта. А дијабетесот тип 2 бил 3 пати почест во оваа група.

Ова е набљудувачка студија и како таква не може да ја утврди причината. Бидејќи сите учесници биле Бразилци, наодите можеби нема да бидат пошироко применливи на другите етнички групи и нации, предупредиле истражувачите.