Македонската ракометна репрезентација в четврток во Прешов го игра првиот меч од баражот за пласман на Светското првенство кое се одржува идната година. Реваншот со Словачка ќе следи в недела во Скопје, а победникот ќе патува на Мундијалот.

Македонија е фаворит на овој двомеч, но Словачка планира да направи се што може за да ги помати сметките на црвено-жолтите за пласман на осмиот мундијал во низа.

Во тимот на Словачка владее оптимизам, откако во претходната фаза од квалификациите тесно ја совлада Украина со вкупен резултат 58-56.

Словаците знаат дека во реваншот во Скопје ќе бидат под голем притисок затоа посакуваат победа и тоа со што поголема разлика во Прешов в четврток.

– Немаме што да изгубиме, мора да ги оставиме срцата таму (во Скопје н.з.). Знаеме каква е атмосферата таму, ќе биде уште потешко. Ако сакаме да размислуваме за пласман, мора да избориме добар резултат од домашниот натпревар – нагласи голманот Марјан Жернович, кој игра за унгарски Будај Фаркасок.

Томаш Сметанка, средниот бек од словачкиот клуб Бојнице, смета дека Словачка може да ја изненади Македонија.

– Тие ќе бидат фаворити, тие се искусни, играа и на претходното Европско првенство. Сепак и ние имаме квалитет, можеме да ги изненадиме. Ни недостасуваат некои играчи, но тоа е спортот, мечот почнува од 0-0. Мора да ги третираме како Украина, да се браниме добро, а голманот мора да фати нешто – рече 23-годишниот ракометар на Словачка.

РФМ: Во продажба билетите за натпреварот Македонија – Словачка за пласман на СП 2027

ФОТО | Ракометарите летнаа на мундијалска битка во Прешов