Судијката Добрила Кацарска во вчерашното интервју во емисијата „360 степени“ рече дека Камчеви не барале правни совети од неа за случајот „Рекет“.

– Ниту мајката на Орце, Ратка Камчева, со која сум премногу блиска, секој ден се слушаме и гледаме, не ми спомнала ништо за случајот – вели Кацарска.

Кацарска рече дека доколку Орце Камчев и кажел дека му бараат пари, таа ќе го советувала да не дава. Вели дека можеби и некој сакал да го намести Камчев дека нуди мито.

– Ако ми кажеа дека му бараат пари, јас ќе го советував да не дава. Од друга страна, можеби и некој сакаше да го намести и да рече дека тој нуди парични средства. Треба да им бидам благодарна што не ме вмешаа. А, факт е дека јас бев постојано со неговата сестра и мајка додека беше во притвор – вели Кацарска.

Кацарска вели дека е за ветинг во судството и дека тоа не го смета за притисок врз судството. Таа смета дека за ветинг не е потребна промена на Уставот и дека проверката на имотот на судиите може да започне и со Антикорупциската комисија.