24-годишен учесник на вчерашната блокада на „Пластичарска“ е уапсен откако нападнал полицаец, соопшти МВР.

– Нападот се случил додека полицискиот службеник извршувал службени дејствија, односно регулирал сообраќај за време на одржување протест. Повредениот полицаец бил пренесен во Градската општа болница „Св. Наум Охридски“, каде му биле констатирани телесни повреди – соопшти полицијата.

По целосно документирање на настанот, против осомничениот ќе биде поднесена соодветна пријава.

Жители на Серава немаат струја и ја блокираа „Пластичарска“, од ЕВН велат: Вработените трпат закани, наголемо се краде

Жители на населбата Серава во Чаир веќе трет ден се без струја, поради дефект кој, според нив, ЕВН не го санира и тие вчера го блокираа сообраќајот на улицата „Пластичарска“.

Граѓаните кои ја блокираа улицата за телевизијата „21“. велат дека немаат намера да отстапат додека дефектот не се санира. Тие дури обвинија дека дефектот е намерно оставен несаниран, за тие да биле без струја во студените ноќи и пред празниците.

Од компанијата велат дека сè додека екипите немаат пристап за реализација на проектот за реконструкција на нисконапонската мрежа, ќе биде невозможно да се санираат дефектите, кои според нив ќе продолжат да се појавуваат како последица на пренатрупаност од диви приклучоци. Според ЕВН, во овој регион, загубите на струја надминуваат 70%, додека наплатата е само 60% од потрошувачката.