Милосављев пред Келн: Моите соиграчи се најголемите херои! – Слободен печат
РакометСпорт

Милосављев пред Келн: Моите соиграчи се најголемите херои!

За многу краток период уште на самиот старт на сезоната српскиот голман Милосављев се промовираше како прва опција на неговата позиција на „црвено-црните“.

После заминувањето на Арпад Штербик, постоеше мало сомнение дека Вардар ќе биде „ослабен“ на голманското место, но Дејан Милосављев целосно го докажа спротивното.

Еден од клучните играчи во тимот на Парондо вели дека голема заслуга за неговите настапи има и тренерот на голманите, Дејан Периќ.

– Се разбира, тренинзите и добрата соработка со најдобрите играчи во светот ми дадоа верба и ја подигнав самодовербата за да можам да играм против сите. Сакам да играм под притисок и, како што велат тренерите и искусните играчи, нема шампиони ако нема притисок – рече Милосављев за официјалниот сајт на Европската ракометна федерација (EHF/Amina Idrizi).

Вардар се соочи со многу пречки оваа сезона, но ракометарите се желни да испишат нова историја, и благодарение на одличната тимска работа, трета година по ред Вардарци ќе настапат на завршниот турнир во ЛШ.

– Желбата за победа и големиот квалитет и искуство на играчите се заштитен знак на Вардар. Вистинските херои се раѓаат кога се соочуваат со тешки ситуации и можам слободно да кажам дека моите соиграчи се најголемите херои што ги познавам – додаде голманот на Вардар.

На 1 и 2 јуни се завршните битки во Келн за титулата во ЛШ, во вечерниот термин од 18:00 часот македонскиот шампион ќе ги одмери силите против можеби најголемиот фаворит за тронот, Барселона. За чуварот на мрежата Фајнал фор турнирот е сон на секој ракометар:

– Келн покажал дека не секогаш победуваат фаворитите. Мислам дека има многу фактори кои можат да одлучат кој ќе заврши на врвот. Се надевам дека ќе бидеме здрави и подготвени да го дадеме најдоброто на теренот. Играме во полуфиналето против тим кој игра перфектно, но ќе се бориме. Мојата желба за оваа сезона е да бидеме шампиони во Келн – вели Милосављев.

Потсетување дека Вардар го промовираше новиот дрес со кој ќе настапи на ракометниот спектакл во Германија.

Преземањето на оваа содржина или на делови од неа без непосреден договор со редакцијата на Слободен Печат значи експлицитно прифаќање на условите за преземање, кои се објавени на сајтот.

Тагови

Напишете коментар

Вашата адреса за е-пошта нема да биде објавена. Задолжителните полиња се означени со *

Close