Факултетот за физичко образование, спорт и здравје (ФФОСЗ), по повод 45 години од фомирањето ја организираше Петтата меѓународна конференција, посветена на истражувањата во областа на спортот и физичката култура.

Конференцијата беше онлајн, а пленарни предавачи беа деканката на ФФОСЗ, проф-д-р Ленче Алексовска – Величковска, како и гостите, проф. д-р Бранислав Антала од Словачка и проф. д-р Мехмет Гунај од сродниот факултет во Анкара, Турција.

Во рамките на конференцијата, свое обраќање имаше и ректорот на Универзитетот „Св. Кирил и Методиј“, проф-д-р Никола Јанкуловски, а беше емитуван и документарен филм, посветен на ФФОСЗ.

– Факултетот за физичко образование, спорт и здравје има со што да се пофали во изминатите четири ипол децении постоење. Продолжуваме по стапките на основачите и сите оние што дадоа придонес за неговата афирмација, како во земјава, така и во странство. Особено сме горди што институциите ја сфаќаат важноста на физичкото воспитување и образование кај младите. Круна на таа соработка е воведувањето „тандем наставници“.

На часот по физичко кај учениците од прво до петто одделение, покрај одделенскиот, сега има и наставник со диплома од нашиот Факултет, со цел подобрување на квалитетот на наставата по тој предмет, а со тоа и на здравјето на младата генерација – изјави за „Слободен печат“ проф. Д-р Ленче Алексовска.