Овие денови топ тема во фудбалскиот свет е најавуваниот трансфер на Ерлинг Халанд од Борусија Дортмунд во Манчестер сити.

Во понеделникот новинарот Фабрицио Романо на својот Твитер профил потврди дека наскоро Норвежанецот ќе потпише договор со „граѓаните“. Младиот Халанд е еден од најбараните фудбалери на денешницата, многу тренери го посакуваат во своите редови.

Меѓу нив е и менаџерот на Лидс, Џеси Марш, Американецот исто така има низа пофалби за 21-годишниот играч и поради една интересна причина го посакува на „Еланд роуд“.

– Да, Ерлинг Халанд е предодреден да биде еден од најдобрите играчи во светот. Тоа е неговиот квалитет, но и неговиот талент. Посакувам да се врати дома овде во Лидс, ова е неговиот роден град и родно место, но ја разбирам одлуката тој да замине во Манчестер сити.

Ќе биде интересно, тој е експлозивен играч во транзиција и Манчестер сити често игра многу по посед. Тој може да игра во секој стил на игра, но секако верувам дека тоа го прави Манчестер сити – еден од, ако не и најдобриот тим во светот – уште подобар. Заслуга за нив што го направија тоа и секогаш му посакувам сè најдобро на Ерлинг, тој е неверојатно човечко суштество – вели Марш за британските медиуми.