Дејвис куп тениската репрезентација на Македонија оваа година ќе го има своето 28 учество во Дејвис купот, а денеска против Малта нашите најдобри тенисери ќе го одиграат јубилејниот 100 меч.

Досегашниот учинок е 56 победи и 43 порази, со три меча кои не беа одиграни бидејќи немаа резултатско значење (2003 – Молдавија, 2004 – Монако и 2005 – Данска).

Против репрезентацијата на Малта нашите тенисери досега имаат две победи во исто толку мечеви во рамките на Третата зона од Дејвис купот. Во 2014 година во Унгарија, Македонија победи со 3:0. Трите поени ги донесоа Томислав Јотовски и Димитар Грабул во сингл мечевите, како и дублот Грабул – Шендрит Деари. Во 2017 година во Бугарија, Македонија победи со 2:1. Грабул донесе водство од 1:0, потоа Јотовски загуби во сингл мечот, а дублот Грабул-Деари го освои решавачкиот поен за победа.

Според правилата на Дејвис купот во Третата зона се играат два синл меча и потоа еден дубл. Тоа значи дека први на терен ќе се појават второрангираните играчи од репрезентациите, потоа играат прворангираните, а на крајот дубловите. Во наш случај прв би требало да игра Обрад Марковски (втор), потоа Калин Ивановски (прв), а најверојатно во дубл ќе играат Ивановски и Берк Бугариќ бидејќи заедно играа и на Macedonian Open и на фјучрсот во Скопје.

Покрај мечот Македонија – Малта, од групата „Б“ во Ларнака во првото коло ќе играат уште Кипар – Молдавија, а во групата „А“ е дуелот Естонија – Црна Гора, додека слободна е селекцијата на Сан Марино.