Белорускиот претседател Александар Лукашенко им се закани на земји на НАТО и на Украина со балистичката ракета со среден дострел „Орешник“, објави „РБЦ-Украина“.

Тој ги коментираше изјавите на украинскиот претседател Володимир Зеленски, кој рече дека руските ракети „Орешник“ распоредени во Белорусија треба да се сметаат за легитимни цели.

– Не велам дека утре ќе ги погодиме Вилнус, Варшава или Киев со „Орешник“. Дај Боже да не дојде до тоа. Тоа не е наша задача. Нашата задача е да ја заштитиме нашата земја. А ако не сакате „Орешник“ да удри, тогаш не мешајте се во нашите работи, ниту од Украина, ниту од Полска, Литванија или од Летонија. Да ги решаваме прашањата на цивилизиран начин – изјави Лукашенко.

ВИДЕО | Белорусија распоредува ракети „oрешник“ низ својата територија

Тој додаде дека нема само да гледа ако соседните земји почнат да ги сметаат целите на белоруска територија за легитимни.

– На 70 километри, на 200 километри. Имаме средства со кои можеме да ги погодиме. Затоа би ги советувал да не трескаат празни закани. Ако „Орешник“ го сметаат за легитимна цел, добро – рече Лукашенко.

Тој нагласи и дека „Орешник“ е мобилен ракетен систем. Според него, системот може да користи и мамки.

– Со други зборови, десет возила ќе се движат по маршрутата. Одозгора ќе изгледа како десет системи „Орешник“, но само еден ќе биде вистински. За секој отров секогаш постои противотров – изјави претседателот.

Кон крајот на февруари, украинскиот претседател Володимир Зеленски нагласи дека „Орешник“ во Белорусија треба да се смета за легитимна цел за земјите од НАТО.

Тој посочи и дека целиот систем „Орешник“ сè уште не е целосно распоредeн во Белорусија, но дека потребната опрема веќе е доставена таму.

Зеленски потпиша указ за воведување санкции против Лукашенко