Македонскиот актер Лазар Бараков, препознатлив по своите улоги во култните домашни телевизиски серии и театарски проекти, на социјалните мрежи сподели фотографија што разбуди силна носталгија кај публиката. Бараков објави колаж од сцени и ликови од легендарните „Македонски народни приказни“, придружени со порака во која го поставува прашањето што многумина одамна си го поставуваат: зошто некогашните серии беа толку добри?

Неговиот одговор е директен – во актерите и во приказните што знаеја да допрат до гледачите.

„Ако некој праша?! Зошто приказните беа толку добри … Еве зошто, по ред и редослед“, стои во објавата, со која актерот потсетува на времето кога домашната телевизиска продукција создаваше содржини што и денес живеат во меморијата на публиката. На сликата која ја сподели се Ѓорѓи Колозов и другите легенди од приказните.

Лазар Бараков е актер со долгогодишно присуство на македонската сцена, еден од омилените во „Македонски народни приказни“. Публиката го памети како дел од генерацијата актери што создадоа автентичен македонски телевизиски израз.

Неговата објава повторно ја отвори темата за квалитетот на домашната продукција и потсети дека магијата на старите серии не била случајна – таа се темелела на забавни сценарија, внимателна режија и актери кои знаеја како да ѝ дадат душа на секоја приказна.