Премиерот на Косово, Албин Курти, изјави на Светскиот економски форум во Давос дека за време на мандатот на неговата влада, при носењето политички одлуки и управувањето со институциите, применувал комбинација од нормативната правда на Имануел Кант, утилитаризмот на Џон Стјуарт Мил и Аристотеловата етика на доблеста, пренесе Данас.

„Во нашиот начин на управување ја комбиниравме кантовската нормативна правда (моралот како извор на дејствување) со утилитаризмот на Џон Стјуарт Мил (максимална среќа за мнозинството), интегрирајќи ги овие принципи во носењето одлуки и во односите со луѓето“, изјави Курти, пренесува Косово онлајн.

Говорејќи за државните функционери, Курти истакна дека владата ја следела Аристотеловата етика на доблеста.

„За државните функционери ја следевме Аристотеловата етика на доблеста, нагласувајќи ја важноста на доблесни лидери на клучни позиции, но секогаш поврзани со народот“, наведе тој.

Според неговите зборови, овој „етички триаголник“ Кант–Мил–Аристотел бил применет при креирањето политики и управувањето со човечките ресурси и се покажал како корисен.

Дел од неговиот говор, во кој го објаснуваше својот филозофски пристап кон управувањето, беше објавен на Фејсбук-профилот на Движењето Самоопределување.