Ана Крстаноска е млада и креативна жена, која стои зад еден од најубавите инстаграм-профили за храна кај нас – „Ана кичен корнер“ (ana_kitchen_corner).

Готвењето ѝ е вистинска пасија и хоби на кое му пристапува со голема љубов и посветеност.

– Приготвувањето храна го доживувам како мое хоби, кое го надополнувам со многу љубов и внимание секогаш кога сум во можност. Среќна сум кога им спремам нешто вкусно на моето семејство и на моите пријатели и токму тоа ми ја полни душата со позитивна енергија – вели таа.

Денеска ви го претставуваме нејзиниот рецепт за солени потпечени макарони.

– Потпечени макарони се секогаш супер идеја за оброк за целото семејство. Верувам дека сите од вас ги приготвувате доста често и ги обожавате, па еве јас како ги подготвувам – вели Крстаноска.

Потребни состојки:

• 500 г макарони
• 3-4 јајца
• Чаша млеко (може и повеќе)
• Чаша од течноста која се вареле макароните
• Сирење
• Кашкавал
• Сол и оригано

Подготовка:

Сварете ги макароните на вообичаен начин.

Потоа земете едно тавче, премачкајте го со масло и ставете ги сварените макарони. Врз нив прелијте ја претходно измешаната смеса од јајца, млеко и дробено сирење. По потреба, додајте од водата во која сте ги вареле макароните од причина што не треба да бидат суви. За крај, изрендајте кашкавал над нив и наросете оригано.

Печете ги макароните во загреана рерна на 200 степени, додека не заруменат. К.С.