Чешка, Израел и домаќинот на групата Естонија се противниците на македонската кошаркарска сениорска репрезентација во рамки на олимписките претквалификации кои оваа година ќе се одиграат во периодот од 12-20 август.

Своите очекувања ги истакна Бојан Крстевски, стандардното крило на нашиот сениорски национален состав.

– Можевме да поминеме и подобро во жрепката. Добивме силни, квалитетни противници. Еден од нив е домаќинот на турнирот во Талин, селекцијата на Естонија. Но, уште поголем квалитет се и Чешка и Израел, постојани учесници на Евробаскетот – вели Крстевски.

Според нашиот репрезентативец овие мечеви ќе бидат добредојдени како подготовка пред главните квалификации за пласман на следното Европско првенство.

– Наша цел на турнирот ќе биде да направиме добра подготовка за она што нè чека во евроквалификациите. Да се воиграме уште подобро за новиот циклус во кој се бара место на Евробаскетот – рече Крстевски.