Колинда ја отстрани, дали Милановиќ ќе ја врати бистата на Тито кабинетот на хрватскиот претседател?
Актуелната претседателка Колинда Грабар-Китаровиќ на почетокот на мандатот ја отстрани оваа биста.
По изборот на Зоран Милановиќ за претседател на Хрватска, едно од прашањата кои се поставува е дали со вселувањето во претседателската палата на Пантовчак ќе ја врати и бистата на Јосип Броз Тито, пишуваат балканските медиуми.
Актуелната претседателка Колинда Грабар-Китаровиќ на почетокот на мандатот ја отстрани оваа биста.
Според пишувањата на загрепскиот „Јутарњи лист“, од штабот на Милановиќ засега немаат одговор на ова прашање, а Јошко Клисовиќ од тој штаб вели дека лично смета оти новиот претседател треба да ја врати бистата.
– Бистата на Тито треба да се врати на Пантовчак, и тоа поради контекстот во кој таму ја постави првиот хрватски претседател Фрањо Туѓман, а тоа е контекстот на единство на хрватскиот народ и заслугата кон Тито како водач на антифашистичкото движење за Хрватска да биде на страната на победниците во Втората светска војна, и тоа во сегашните граници кои ги вклучува Далмација, Истра и Барања – рече Клисовиќ.
Затоа, тој смета дека бистата на Тито треба да се врати во кабинетот на претседателот на Хрватска и на тој начин да се потврди допринесот во специфичните историски околности за опстанок на Хрватска и напредокот на хрватскиот народ.
– Ниту еден досегашен претседател на Хрватска не го оспори тоа што Туѓман поставуваше бисти на заслужни Хрвати, освен Колинда Грабар-Китаровиќ, а тоа сега треба да се поправи – констатира Клисовиќ.