Националниот медицински истражувачки центар за радиологија при руското Министерство за здравство, во соработка со Националниот истражувачки центар за епидемиологија и микробиологија „Гамалеја“, го доби првото одобрение во светот за мРНК антитуморска вакцина. Таа би можела да стане достапна за возрасни пациенти со неоперабилен или метастатски меланом, објави Националниот медицински истражувачки центар за радиологија, објави „Евроњуз“.

Вакцината е наменета за возрасни пациенти со неоперабилен или метастатски меланом, во комбинација со инхибитори на имунолошките контролни точки (ICI), како и за пациенти кај кои меланомот бил хируршки отстранет, односно по отстранување на сите метастатски жаришта, како дополнителна (адјувантна) терапија во комбинација со ICI.

Терапијата се базира на индивидуалниот генетски профил на туморот кај секој пациент, што му овозможува на имунолошкиот систем да биде „обучен“ да ги препознае и уништува исклучиво туморските клетки, со што се минимизира оштетувањето на здравото ткиво.

На веб-страницата на Националниот медицински истражувачки центар за радиологија е наведено кои пациенти се кандидати за примање на вакцината против рак на кожата – лица кај кои претходно бил дијагностициран меланом, биле лекувани, а сега имаат повторна појава на болеста, но без метастази во мозокот, лица кај кои неодамна е дијагностициран меланом во стадиум IIB–IV и сè уште не примиле никаква антитуморска терапија, но кај кои е планиран хируршки зафат и лица со дијагностициран меланом со далечни метастази, но без метастази во мозокот, кои досега не примале никаква медикаментозна антитуморска терапија.