Поранешната четврта тенисерка во светот, Јелена Докиќ, деновиве престојува во Македонија, а впечатоците од посетата на Скопје ги сподели со своите следбеници на социјалните мрежи.

Докиќ, која во текот на кариерата настапуваше под знамето на Австралија, а претходно и на тогашната Сојузна Република Југославија, во главниот град пристигна во друштво на својот партнер. Двајцата ги посетија најпознатите скопски знаменитости, меѓу кои кањонот Матка, Старата скопска чаршија, плоштадот „Македонија“ и црквата Свети Константин и Елена.

„Скопје, убаво си!“, напиша Докиќ покрај серијата фотографии објавени на Инстаграм, на кои може да се види како го истражува градот и ужива во неговите препознатливи локации.

Нејзината објава наиде на позитивни реакции од следбениците, кои ѝ посакаа пријатен престој и ја охрабрија да продолжи да ги открива убавините на Македонија.

Според објавите на нејзиниот профил, патувањето низ земјава започнало неколку дена претходно, кога сподели фотографија од традиционален појадок со ѓеврек и јогурт, за кој се претпоставува дека бил направен за време на престојот во Охрид.

Докиќ е една од најпознатите тенисерки од својата генерација. Во кариерата стигна до четвртото место на ВТА-листата и беше дел од самиот светски врв на женскиот тенис. По завршувањето на професионалната кариера, таа отворено зборуваше за тешкото детство и насилството што го трпела од својот татко и поранешен тренер Дамир Докиќ, а денес е успешен спортски коментатор и аналитичар, редовно ангажиран за време на Австралија опен.

Почина таткото на поранешната тенисерка Јелена Докиќ кој ја тепаше низ кариерата