За многумина, кафето е многу повеќе од утрински ритуал или брз извор на енергија. Тоа е дел од секојдневниот живот, општествен обичај и пијалак без кој многумина не можат да го замислат денот. Сепак, додека дебатите обично се однесуваат на видот на зрната, степенот на печење или потеклото на кафето, научните истражувања сè повеќе укажуваат на нешто многу поважно, начинот на подготовка.

Различни видови кафе не се разликуваат само по вкус и мирис, туку и по тоа како влијаат на телото – особено на срцето, холестеролот, желудникот и сонот – затоа што клучната разлика често не е во зрното, туку во начинот на подготовка и во тоа дали кафето се филтрира или се пие со талог.

Новите истражувања покажуваат дека разликата помеѓу филтер кафето и видот кафе што најчесто го пиеме на Балканот или во кафулињата не е само во вкусот. Може да има и долгорочни последици за здравјето на срцето и крвните садови.

Се испоставува дека едниот метод на приготвување може дури и да го штити срцето, додека другиот тивко го зголемува нивото на лошиот ЛДЛ холестерол.

Тајната е во талогот

Кафето природно содржи масла наречени дитерпени. Овие супстанции можат да го зголемат нивото на холестерол во крвта, но количината што завршува во шолјата зависи токму од начинот на подготовка.

Победник за срцето – филтер кафе

Ако сакате да пиете кафе без да се грижите за холестеролот, филтер кафето е најдобриот избор.

Причината е хартиениот филтер. Кога врела вода се прелива врз меленото кафе преку хартиенот филтер, тој ги задржува речиси сите масла што го зголемуваат холестеролот. Во шолјата остануваат кофеинот, аромата и антиоксидантите, но без повеќето штетни материи.

Истражувањата дури покажуваат дека луѓето кои редовно пијат филтер кафе може да имаат помал ризик од срцеви болести во споредба со оние кои воопшто не пијат кафе.

Добра алтернатива – инстант кафето

Можеби звучи изненадувачки, но дури и инстант кафето, она во гранули или во прав кое само се прелива со врела вода, е релативно безбедно кога станува збор за холестеролот.

Во текот на индустриската преработка, повеќето масла што можат да влијаат на крвните садови се отстрануваат. Иако вистинските љубители на кафе честопати не се воодушевени од неговиот вкус, тоа е доста безопасно за срцето.

Златна средина – еспресото

Еспресото, кое се подготвува во апарати под притисок или во капсули, се наоѓа некаде помеѓу.

Бидејќи не се користи хартиен филтер, дел од маслото. сепак. завршува во шолјата, што може да се види и во карактеристичниот крем на врвот на еспресото. Сепак, количината на еспресо е мала, обично помеѓу 30 и 40 милилитри, па затоа внесувањето на овие супстанции е релативно ниско.

За повеќето здрави луѓе, две до три шолји еспресо дневно немаат значително влијание врз нивото на холестерол.

Турското/домашното кафе, кое се подготвува со варење на меленото кафе во водата и се служи заедно со талогот, се смета за најпроблематично кога станува збор за холестерол.

Бидејќи нема филтрација, а кафето долго останува во контакт со врелата вода, во напивката преоѓа голема количина дитерпени дури до 30 пати повеќе отколку во филтер кафето.

Поради тоа, луѓето со висок холестерол или со проблеми со срцето треба да го ограничат внесувањето на турско кафе или да го заменат со некој друг начин на подготовка.

Колку кафе е премногу?

Европската агенција за безбедност на храната (ЕФСА) наведува дека за здрави возрасни лица безбеден внес е до 400 милиграми кофеин.

Во пракса, ова значи приближно до пет шолји еспресо или филтер кафе дневно, односно до три шолји силно турско кафе, иако во овој случај треба да се води сметка за холестеролот.

За трудниците, лицата со висок крвен притисок или со проблеми со спиењето, препорачаната граница е пониска и обично е околу 200 милиграми кофеин дневно, што е околу две шолји кафе.

Добрата вест е дека не мора да се откажувате од кафето. Ако сте здрави, слободно уживајте во вашиот омилен пијалак. Но, ако сте загрижени за вашиот холестерол, можеби е паметно повремено турското кафе да го замените со филтер кафе или барем да го намалите бројот на шолји што ги пиете во текот на денот. Вашето срце ќе ви биде благодарно.