КК Пелистер: Судиите директно влијаеја во конечниот резултат против Гостивар
Македонскиот вицешампион Пелистер ја започна кошаркарската сезона со пораз на гостувањето кај Гостивар (91:79).
КК Пелистер ја известува јавноста дека делегирањето на судиите на натпреварот од првото коло во шампионатот против КК Гостивар не кореспондира на епитетот дерби на колото.
– Со својот критериум судиите директно влијаеја на текот на натпреварот и конечниот резултат. Исто така апелираме да се преземат мерки кон многубројните неофицијални лица кои беа присутни во салата, иако натпреварот требаше да се игра пред празни трибини и без присуство на гледачи. Присутните не само што го следеа натпреварот, туку и навиваа и дофрлаа. Исто така отворено прашуваме зошто претседателот на КК Гостивар, кој е и претседател на Здружението на клубови, постојано ја навредуваше нашата екипа и претставници, што се случува по вторпат годинава. По сите овие постапки можеме да заклучиме дека КК Гостивар има свој проблем само со нашиот клуб – стои во соопштението на КК Пелистер.
Од клубот воедно информираат дека нивниот играч Донован Доналдсон сериозно се повреди на споменатиот меч и итно беше пренесен во битолската болница.
Евидентирано е кинење на тетивата и во денешните утрински часови веднаш кошаркарот беше подлегнат на оперативен зафат. Истиот помина во најдобар ред и кошаркарот го започна процесот на рехабилитација.