Најдобриот македонски кикбоксер кој е трикратен светски шампион и европски шампион од 2018 година, Димитар Ѓорѓиев, утревечер ќе дебитира во професионалните води во дисциплината лоу-кик дисциплина, до 81,4 килограми.

Борбата ќе се одржи во Зворник, Босна и Херцегонија, а противник на Ѓорѓиев ќе му биде домашниот кикбоксер Никола Дробњак. Според пропозициите борбата ќе биде во пет рунди од по три минути.  Ѓорѓиев и Дробњак досега два пати се бореле во аматерска конкуренција и резултатот е нерешен.

– Досега се натпреварував само на аматерско ниво, ова е моја прва професионална борба и прва шанса за професионална победа и се надевам дека ќе победам. Мислам дека ќе прикажеме одлична борба за публиката што е најважно, да има квалитетен меч, а судиите на крајот ќе го прогласат победникот. Првиот пат против него загубив, вториот пат победив пред шест месеци, па затоа ова сега ќе биде финале меѓу нас – рече Ѓорѓиев.

Настанот во Зворник почнува утревечер во 20 часот, а борбата меѓу Ѓорѓиев и Дробњак треба да започне околу 22.30 часот. Во шестата борба ќе настапи и вториот Македонец, сотимецот на Ѓорѓиев од клубот Адора Работнички, Бобан Илиоски, во дисциплината К-1, до 83,4 килограми.