Македонските каратисти Витомир Трајковски и Стефан Стојановиќ ќе бидат дел од Светските боречки игри 2023 за возрасни до 21 година кои ќе се одржат во периодот од 20 до 30 октомври во Ријад, Саудиска Арабија.

И двајцата се членови на скопскиот карате клуб „Макпетрол“, Трајковски ќе се натпреварува во категоријата под 85 килограми, а Стојановиќ ќе се бори во категоријата над 85 кг.

Ваквото известување за учеството на двајцата наши каратисти е испратено од организаторот на игрите, Светската карате федерација (ВКФ), до Карате федерацијата на Македонија (КФМ).

Од Карате федерацијата на Македонија се очекува да испрати одговор до ВКФ дека нашите репрезентативци ќе присуствуваат во Ријад.

Воедно Карате федерацијата на Македонија треба да обезбеди и средства за учество.