Раперот Канје Вест се појави во судот во Лос Анџелес поради тужба поврзана со неговата поранешна вила во Малибу, а светските медиуми известуваат дека за време на сослушувањето изгледал видливо изморен. Според очевидци, тој повеќепати се прозевал, ги затворал очите и се чинело дека главата му паѓа напред додека одговарал на прашања за реконструкцијата на вилата, пренесува „Холивуд репортер“.

Вилата е дизајнирана од јапонскиот архитект Тадао Андо , познат по своите дела што вклучуваат архитектура и пејзаж, а која раперот ја „уништил“ додека работел на архитектонското чудо. Тој ја купил во 2021 година за 57 милиони долари и ја продал три години подоцна со огромна загуба, ослободувајќи се од имотот за 21 милион долари. Вест изјавил пред судот дека „не се сеќава“ на детали за работите, што го забележал и еден од адвокатите, кој веднаш искоментирал: „Дали спие?“, додека судијата го потсетил дека е потребно малку поостро испрашување.

Судскиот случај се однесува на тужба од изведувачот Тони Саксон, кој тврди дека Вест не ги плаќал работниците, создавал небезбедни услови и незаконски го отпуштил. Саксон тврди дека раперот сакал вилата да биде „засолниште од бомби од 1910-тите“ каде тој би можел „да се крие од Клинтон и Кардашијан“. Во моментот, вилата нема прозорци, врати, струја и водовод.

Вест ја негира тужбата, а уште во ноември 2023 година барал случајот да се отфрли, тврдејќи дека не бил одговорен за настанатата штета.