Каде во Европа се спие најдобро, а каде најлошо? Објавена е нова листа
Ново истражување откри кои европски градови се најдобри, а кои најлоши за спиење. Европскиот индекс на квалитет на сон за 2026 година ги спореди условите во 25 градови за да се утврди каде туристите можат најдобро да се одморат за време на престојот, пренесува „Дејли мејл“.
Препорачано
Како се рангирани градовите
Индексот анализирал податоци за животната средина и навиките кои влијаат на ноќниот одмор, вклучувајќи ја бучавата, светлосното загадување, квалитетот на воздухот, стапките на пушење, консумацијата на алкохол, како и просечното траење на сонот кај жителите и посетителите. Секој фактор бил оценет со систем на казнени поени, па понизок вкупен резултат значи подобри услови за спиење.
Прага и Барселона на дното
На дното на листата се наоѓа Прага, следат Варшава и Барселона. Овие градови се карактеризираат со долготрајна ноќна бучава, концентрирани области со доцни ноќни активности и поголем сообраќаен метеж. Прага е лошо рангирана поради високата консумација на алкохол и стапката на пушење, како и значително повисоки нивоа на бучава во споредба со другите градови.
Барселона, трет најлош град за спиење, забележала највисоко ниво на бучава од сите 25 градови поради големиот број посетители, живописниот ноќен живот и густата населба.
Лондон меѓу најлошите
Лондон зазеде 20-то место од 25 градови. Клучните фактори кои го нарушуваат квалитетот на сон во британската престолнина се загадувањето на воздухот, доцните враќања од работа и изложеноста на бучава. Големиот сообраќај, ноќниот живот и општата „заднина“ на шум создаваат речиси неизбежни нарушувања на спиењето, особено на туристички популарните локации.
Најдобри градови за одмор
Од друга страна, Цирих е прогласен за најдобар европски град за спиење, следат Амстердам и Стокхолм. Овие градови постигнале добри резултати благодарение на пониски нивоа на бучава и подобро управување со ноќните активности.
Цирих се издвојува со ниско светлосно загадување и умерен квалитет на воздухот, додека Амстердам и Стокхолм користат стратешко урбано планирање, зелени површини и контрола на сообраќајот за намалување на бучавата.
Квалитетот на сон не е загарантиран
Родни Рју, извршен директор на Coway Europe, кој ја спровел студијата, изјави:
„Патниците често претпоставуваат дека лошиот сон е дел од посетата на еден забрзан град, но податоците покажуваат дека некои дестинации многу подобро управуваат со ноќните услови од други. Изложеноста на бучава и квалитетот на воздухот директно влијаат на тоа колку добро луѓето спијат, без разлика дали живеат во градот или се само на краток престој.
Лошиот сон не е неизбежен дел од урбаното патување. Градовите кои сериозно се посветуваат на намалување на бучава, квалитет на воздухот и ноќно планирање создаваат подобри услови не само за жителите, туку и за посетителите.“
Истражувањето покажува дека големината на градот не одредува нужно и квалитет на сон. На пример, Париз, и покрај слична густина на население, туризам и сообраќајни притисоци, постигнал малку подобар резултат.
Целата листа (од најдобри до најлоши за спиење):
1. Цирих
2. Амстердам
3. Стокхолм
4. Копенхаген
5. Брисел
6. Штутгарт
7. Базел
8. Хамбург
9. Минхен
10. Женева
11. Келн
12. Франкфурт на Мајна
13. Берлин
14. Грац
15. Линц
16. Рим
17. Париз
18. Мадрид
19. Будимпешта
20. Лондон
21. Милано
22. Виена
23. Барселона
24. Варшава
25. Прага
