Историска шампионска титула за играчите на одбојкарски клуб Штип Угд од Штип кои со 3:0 (25:18, 25:18, 25:16) го победија Борец Велес во третиот натпревар од финалето на плејофот во Првата лига мажи и во три чекори, односно со 3:0 во финалната серија стигнаа до епитетот првак на Македонија.

Клубот откако пред помалку од еден месец го крена куп пехарот, денеска ги обедини круните и ја потврди апсолутната доминација кај мажите.

Во последниот меч Штип Угд имаше комплетна контрола над резултатот и случувањата на теренот, помалку грешеше и се радуваше на крајот.

Со овој триумф штипскиот состав стигна до седмата победа во исто толку меѓусебни натпревари сезонава против Борец Велес.
Михајло Мирасчиев со 12 поени, како и Задмард, Џуниор Илиев со по осум го предводеа Штип, додека кај Борец, Бастос со 8 и Оливеира со 7 поени беа најрасположени.