Исчезна глумицата Наја Ривера: 4-годишниот син бил сам на бродот, се претпоставува дека се удавила
Глумицата Наја Ривера (33), позната по серијата „Glee“, во средата попладне исчезнала на езерото Пир во Јужна Калифорнија, пишува Дејли мејл. Полицијата започнала потрага по глумицата, откако го пронашле нејзиниот 4-годишен син Хозе Холис Дорси сам на бродот.
Момчето и кажало на полицијата дека мајка му скокнала и веќе не се вратила. Официјалните власти претпоставуваат дека Наја се удавила, но сè уште ништо не е докажано. По глумицата трагаат нуркачи, хеликоптер и дронови.
Глумицата изнајмила брод за да се вози по езерото, а откако полицијата го пронашла, нејзиниот син бил вратен на семејството за да биде на сигурно.
Во средата Наја објавила фотографија со синчето на социјалните мрежи.
„Само ние двајца“, напишала покрај фотографијата.
Пред две години Наја се разведе од Рајан Дорси и оттогаш нејзиниот син живеел со неа.