Социјалната мрежа Инстаграм воведува нова функција што корисниците долго време ја бараа – можност за уредување на коментари. Корисниците ќе можат да ги исправат грешките при пишување или да ги изменат своите коментари во рок од 15 минути по објавата, а покрај изменетиот коментар ќе стои посебна ознака, пишува „Соушл медиа тудеј“.

Новата опција „уреди“ ќе се наоѓа директно под објавениот коментар. Со нејзино избирање се отвора текстуално поле за брзи измени во рамките на зададениот рок од 15 минути. По зачувувањето на промените, коментарот добива сива ознака „уредено“ за да се задржи транспарентноста. Сепак, другите корисници нема да можат да ја видат историјата на претходните верзии на коментарот.

Оваа функција доаѓа по неколку поголеми ажурирања на платформата на почетокот на 2026 година. Во една од позначајните промени, „Мета“ неодамна потврди дека ја укинува целосната енкрипција од крај до крај за директните пораки на Инстаграм. Како причина наведоа исклучително ниска стапка на користење меѓу корисниците, кои за оваа опција требало рачно да се пријават.

Од компанијата посочија дека корисниците кои бараат целосно безбедни разговори и понатаму можат да се потпрат на Ватсап.