Во последните 90 минути, влогот е огромен, а составот на Баже Лазаревски сака да го задржи четвртото место кое води во квалификациите за Лигата на Европа.

Со триумф над Шкупи, па дури и нерешен резултат, европскиот сон ќе стане реалност. Капитенот Баже Илијоски вели дека последниот првенствен меч е големо ’финале’ за Работнички.

– Нè очекува вистинско „финале“, многу важен натпревар против Шкупи. Влогот е излез во Европа, а противникот исто така се надева дека ќе успее да ја оствари целта. Ќе биде тешко, неизвесно, го знаеме тоа. Го респектираме и противникот, но подготвени сме за голема борба. Ќе играме на домашен терен и ќе сториме сè за да стигнеме до позитивен резултат, кој ќе не одведе во Лигата на Европа. Веруваме во успех – рече фудбалерот на Работнички, Баже Илијоски.

Во еден момент помислија „романтичарите“ дека шансите се загубени, сега повторно имаат сè во свои раце и ќе се обидат тоа да го искористат.

Мечот меѓу Работнички и Шкупи ќе го суди Марјан Гоцевски од Струмица.