Градот Скопје започна со проектирање на два проекти кои се дел од предизборната програма „За модерно Скопје“ на градоначалничката Данела Арсовска. Станува збор за изградба на нов кружен тек и булеварско решение на улицата Македонска војска во Ѓорче Петров.

Новиот кружен тек на крстосницата меѓу булеварот Македонска војска и улицата Ѓорче Петров, како што велат од Градот, е исполнување на уште едно децениско барање на граѓаните кое досега не е ниту отпочнато со реализација.

Со изградбата на овој кружен тек ќе се растовари сообраќајниот метеж на оваа раскрсница, а воедно ќе се зголеми безбедноста за сите учесници во сообраќајот. Со проектот планирана е изградба на кружен тек и коловозна површина од 11.700 метри квадратни, изградба на нова велосипедска мрежа од 2.700 метри квадратни и пешачка патека од 4.100 метри квадратни – информираат од Град Скопје.

Предвидено е и уредување нова зелена површина на 2000 метри квадратни, со соодветно јавно осветлување и водоводна мрежа.