Новак Ѓоковиќ обезбеди пласман во полуфиналето на Австралија опен, откако Лоренцо Музети беше принуден да го предаде мечот поради повреда, но српскиот тенисер уште еднаш ги воодушеви гледачите со редок пример на фер-плеј што ретко се гледа на врвно ниво.

Музети го освои првиот сет со 6-4, а во вториот на сервис на Ѓоковиќ водеше со 5-3. При резултат 30:15 за Новак, по размена од шест удари Италијанецот се обиде со дијагонален удар, но топката заврши надвор од теренот. Судјата Џејмс Киотавонг досуди поен за Ѓоковиќ и резултат 40:15, но тогаш следуваше неочекуван потег.

Ѓоковиќ му пријде на судијата и побара поенот да му биде доделен на Музети, објаснувајќи дека тој последен ја допрел топката. Резултатот беше коригиран на 30:30, а трибините го наградија српскиот ас со силни аплаузи, додека Музети спортски му се заблагодари.

Подоцна, Ѓоковиќ објасни зошто инсистирал на промената на одлуката, иако ни на забавената снимка не можеше јасно да се забележи контакт меѓу рекетот и топката.

„Ја почувствував вибрацијата на рекетот. Топката го закачи рамот и тоа го почувствував. Зошто му го кажав тоа на судијата. Едноставно, така сум воспитан. Научен сум секогаш да бидам фер и да се однесувам спортски и витешки, без разлика на резултатот“, изјави Ѓоковиќ.

Ѓоковиќ се извлече: Музети доминираше, па му подари полуфинале