Ѓоковиќ лесно го реши Тиафо и донесе нова предност на Тимот на Европа

Новак Ѓоковиќ/фото: EPA-EFE/ANDY RAIN

Новак Ѓоковиќ му донесе нова победа на „Тимот на Европа“ на Лејвер купот што се игра во „О2“ арената во Лондон. Ѓоковиќ релативно лесно со 6:1,6:3 го победи Американецот Френсис Тиафо.

Со овој триумф на Ѓоковиќ, „Тимот на Европа“ поведе со 6-4 во победи над „Тимот на Светот“.

Ѓоковиќ првиот сет го реши со два брејка кои ги направи во четвриот и шестиот гем и за 23 минути ги доби сетот со убедливи 6:1.

Во вториот сет, Тиафо само на моменти наликуваше на тенисерот што неодамна го елиминираше Надал на УС опен, па го намачи Алкараз, но Ѓоковиќ повторо со два брејка го реши сетот и донесе нов бод за „Тимот на Европа“.

По мечот, Ѓоковиќ уште еднаш зборуваше за Федерер кој вчера и официјално стави крај на неверојатната кариера.

– Сите мора да се согласиме дека тоа се можеби најубавите моменти на тенисот досега. Сите знаевме дека тоа ќе биде емотивно збогување со Рожер. Имаше и тага, бидејќи еден од најголемите спортисти на сите времиња го напушта нашиот спорт. Од друга страна, ми беше убаво да го видам среќен. Благодарен сум што сум дел од ова и можам да го доживеам еден од најубавите моменти во животот. Кога ги видов неговите деца на теренот… Тоа беше прекрасно. Убаво е да се видат родителите на Рожер, сопругата Мирка… – изјави Ѓоковиќ по победата.

Видео на денот