Малку познатата американска компанија AAFS Infrastructure and Energy (AAFS Infrastructure and Energy) е блиску до обезбедување концесија за изградба и управување со гасовод што треба да овозможи фосилниот гас испорачан од САД да ги замени испораките што доаѓаат од Русија на Балканот, пишува Гардијан, нагласувајќи дека истражувањето на весникот покажува како американското претседателство ја замаглува линијата помеѓу водењето политика и збогатувањето на владејачкото семејство и луѓето од неговата околина.

Во обемен текст насловен „Зошто енергетските договори на Балканот вредни милијарда долари ги добива малку позната компанија поврзана со Трамп“, Гардијан пишува дека компанијата што е на еден чекор од добивање на договорот нема искуство или доказ дека некогаш се обидела да спроведе проект од приближно таков обем, но „она што го има се лични врски со Доналд Трамп“.

Еден од претставниците на AAFS е адвокатот од Вашингтон, Џеси Бинал, кој го застапувал семејството Трамп во политички случаи. Другиот е Џо Флин, брат на поранешниот советник за национална безбедност на претседателот. И двајцата учествувале во кампања што е особено важна за Трамп – напорите да го поништи неговиот пораз на претседателските избори во 2020 година. Истрагата на Гардијан, врз основа на интервјуа со сегашни и поранешни функционери во Босна и Херцеговина и САД, протечени документи и корпоративни поднесоци, анализираше малку позната компанија што одеднаш се најде во центарот на глобалната битка за енергетска превласт.

Сепак, весникот додава дека влоговите на територијата на поранешна Југославија се поголеми од самото прашање кој би можел да се збогати, наведувајќи дека во овој конкретен случај, мешањето на САД би можело да го поткопа мировниот договор за Босна и Херцеговина што беше постигнат преку нивно посредништво во 1995 година.

Според „Гардијан“, американските претставници јасно ставија до знаење што сака администрацијата на Доналд Трамп: зелено светло за гасоводот „Јужна интерконекција“ до AAFS.

„Гардијан“ наведува дека локалниот претставник на компанијата AAFS во Сараево е Амер Бекан, кој се претставува како „инвеститор и претприемач со богато искуство“, додавајќи дека двапати се обидел во политиката, но без успех, и дека регистрирал компанија наречена AAFS во Босна и Херцеговина во 2021 година.

Хаос на Блискиот Исток: Светот останува без гасот клучен за чиповите, но и за медицината

САД долго време го поддржуваат планот за поврзување на Босна и Херцеговина со гасен терминал на хрватскиот брег, што би го намалило влијанието на Владимир Путин во јужна Европа. За време на мандатот на Бајден, идејата беше проектот да го води државната гасна компанија на Босна и Херцеговина. Сепак, спротивставените интереси на етничките политички групи во земјата предизвикаа постојани одложувања, пишува весникот. Гардијан додава дека некои босански функционери биле претпазливи кон идејата за доверување на проектот на странски приватен капитал, додека други во ангажирањето на компанија поврзана со Трамп гледале можност за надминување на повеќегодишниот застој.

Времето притискаше. БиХ е кандидат за членство во ЕУ, а Брисел постави рок до септември 2027 година за да престане да купува гас од Русија, од каде што моментално доаѓа целото снабдување на БиХ.