Еден од највпечатливите моменти од доделувањето ѕвезди на Холивудската патека на славните за Емили Блант и Стенли Тучи беше говорот на Мерил Стрип, која уште еднаш покажа зошто важи за една од најголемите актерки на сите времиња.

Додека двајцата актери, познати по филмот „Ѓаволот носи Прада“ (The Devil Wears Prada), ги добија своите ѕвезди една до друга, токму Стрип ја освои публиката со топли зборови.

„Емили, се чувствувам како навистина да сум те родила. Толку сум горда на тебе. Сè што кажаа колегите е вистина. Едвај чекам повторно да работам со тебе. А најубавото во тоа што ова го добиваш на толку млада возраст е што ќе те имаме барем уште 35 години – ако мојата кариера е некаков доказ. Јас едноставно… вљубена сум во тебе, како и сите други“, рече Стрип, обраќајќи ѝ се на колешката Блант.

Потоа, во свој препознатлив хумористичен стил, Стрип се осврна и на Тучи, со кого соработуваше и во „Ѓаволот носи Прада“ (The Devil Wears Prada), но и во „Џули и Џулија“ (Julie & Julia).

„Стенли веќе не може да се нарече национално богатство. Јас го прошетав светот и видов дека љубовта што ја добива е глобална – тој буквално ‘се маринира’ во неа. Невозможно е да не го сакате Стенли Тучи – урбан, остроумен, духовит, великодушен, љубопитен и толку елегантен“, изјави таа.

Стрип го пофали и за неговата извонредна способност да се трансформира во секоја улога, како и за неговата повеќеслојна кариера – како актер, режисер, сценарист и продуцент.

На крајот, актерката го заврши својот говор со емотивна нота: „Те познавам подолго како пријател отколку како партнер на сцена. Поминавме заедно и тешки и прекрасни моменти. Те сакам длабоко.“