ФОТО+ВИДЕО: Фантастичен Иџе, „Летечкиот“ Македонец второпласиран во Имола
Продолжува успешната традиција на добри резултати на македонскиот автомобилист на легендарната Имола во рамките од Италија ТЦР шампионатот.
Игор Стефановски во денешната прва трка викендов го освои второто место (+0.816) зад најдобриот Кевин Чекон од Италија.
Инаку во вчерашните квалификациите нашиот натпреварувач имаше четврто најдобро време.
На третата позиција заврши Евгениј Леонов од Русија, а на четвртото место е Никола Балдан од Италија.
Редоследно од петтата од 10 позиција се најдоа Анти Бури (Финска), Салваторе Тавано (Италија), Волт Рубен (Естонија), Ерик Билјадори (Италија), Еторе Карминати (Италија) и Мишел Имберти (Италија).
Втората трка во Имола ќе се одржи в недела од 12.15 часот.
– Конечно возилото има добар сет-ап, тимот направи добра работа, навистина сум горд што доаѓам од една мала земја. Ова македонско знаме ќе се вее уште долго на тркачките патеки. Ви гарантирам дека на следните трки ќе биде уште подобро – рече Стефановски по денешната прва трка.