Откако во употреба е пуштена фотонапонската централа во основното училиште „Киро Глигоров“, наредната година Општина Центар планира поставување фотоволтаици и во училиштата  „Коле Неделковски“ и „Гоце Делчев“, за каде веќе има и готови проекти. Поставената централа  веќе овозможува пониски сметки за електрична енергија и, како што велат од Центар, била високо оценета од европски стручни лица како проект изведен според највисоки технички стандарди.

Општинското трговско друштво „Енергија–Центар“ веќе покажа дека може да испорача резултати, а сега продолжуваме со јасен план и подготвени проекти. За наредната година планираме кадровско екипирање и самостојно работење на претпријатието, вели градоначалникот Горан Герасимовски.

Тој посочи дека се подготвени и проекти за поставување фотоволтаици на катната гаража „Судска палата“, додека проектот за ООУ „11 Октомври“ е подготвен и чека решавање на имотно-правните прашања .

Од Општината информираат дека годинава целосно е завршена постапката за јавни набавки за изработка на основни проекти за сите преостанати основни училишта и катни гаражи од програмата, што отвора пат за конкретни чекори за нивна реализација.

Централите врз детските градинки ќе се реализираат поединечно, во зависност од обезбедени грантови, посебно од изведбите на школите и катните гаражи.