Јапонски замок, кој има сопствен ресторан и лифт, е ставен на продажба, но со одреден услов. Тврдината на шест ката во Акабира, Хокаидо, се нуди на пазарот за „само“ 64.000 долари, но потенцијалните нови сопственици ќе мора да издвојат малку повеќе пари за поправки, пишува „Сан“.

Модерната тврдина, изградена во 1991 година во феудален стил, ги имитира античките дизајни од ерите Едо и Сенгоку. Потсетува на оригиналниот замок Химеџи (под заштита на УНЕСКО) со своите бели ѕидови кои се во контраст со темното дрво, слоевитите покриви со ќерамиди и драматичните покривни конструкции кои наликуваат на птица во лет.

Иако е направен од модерни материјали како бетон и челик, наместо од дрво и камен, на замокот му е потребно малку внимание и нега. Според „Куќите во Јапонија“, замената на ќерамидите и поправката на парапетот се проценуваат на речиси 50.000 долари. Исто така, годишниот данок на имот изнесува приближно 7.700 долари.

Се очекува дека некој „амбициозен крал или кралица“ ќе го преземе имотот кој се простира на 5.045 метри квадратни земјиште, лоциран на кратко возење од ски-центарот Фурано. Имотот е одлично поврзан со аеродромите и возовите кон Сапоро.

Главни карактеристики на замокот се: 40 паркинг места, ресторан на вториот кат, функционален лифт кој ги поврзува сите шест нивоа, веќе приклучени комуналии (струја, вода), голема градина со потенцијал за приватна резиденција, бутик-хотел или уникатен простор за настани.

Овој замок не е единствениот евтин недвижен имот во Јапонија. Купувачи од целиот свет купуваат имоти во руралните делови на островот.

Ерик Буроу (40), сопственик на градежна фирма од Минесота, САД, во декември 2025 година купил куќа од 70-тите години во Ниигата за само 67 долари. Тој не можел да верува во цената на куќата со три спални соби.

Ниската цена се должи на лошата состојба на објектот и слабиот интерес на локалците за реновирање куќи во селата. Ерик планира да ја претвори куќата во „Ербиенби“ со тема „Снупи“ со буџет од околу 25.000 евра.

– Кога ја видов куќата, не можев да поверувам колку чини. Знаев дека брзо ќе се продаде, па дури и не закажав термин за разгледување, само се јавив кај агентите и им реков дека сакам да ја купам – открил Ерик.

Куќата била на пазарот откако претходниот сопственик починал во дом за стари лица.