ФОТО | Уште еден лош фотошоп на Кејт! Принцезата ја уредувала фотографијата со кралицата Елизабета и нејзините правнуци
Откако монтираната фотографија на Кејт Мидлтон и нејзините деца го обиколи светот, една фотоагенција откри уште една фотошоп-грешка на принцезата и тоа на фотографија од кралицата Елизабета Втора со нејзините правнуци, пишува „Дејли мејл“.
Станува збор за фотографија направена од принцезата Кејт во Балморал, во август 2022 година. Фотографијата беше објавена на инстаграм-профилот на принцот и принцезата од Велс на 21 април, денот кога кралицата требаше да го прослави својот 97-ми роденден.
Но, фото-агенцијата „Гети имиџис“ сега тврди дека фотографијата е „дигитално обработена“. Тие откриле неколку грешки, вклучително и линија на здолништето на кралицата која не била права. Делови од зелениот кауч на кој седела кралицата исто така биле „отсечени“, а биле пронајдени и неколку црни дамки зад принцот Џорџ и принцот Луис.
„’Гети имиџис’ ја прегледа предметната фотографија и стави белешка од уредникот на неа, наведувајќи дека фотографијата е дигитално подобрена на изворот“, изјавил портпаролот на компанијата.
Сомнежите за оваа фотографија се покренаа и претходно. Минатата година Кристофер Бузи, извршен директор на технолошка компанија, изјави дека фотографијата е фотошопирана.
Portrait of late Queen Elizabeth II with her grandchildren and great-grandchildren and taken by Kate Middleton was also manipulated, picture agency reveals https://t.co/xEH7OZLXOH pic.twitter.com/UG4cocBV3q
— Daily Mail Online (@MailOnline) March 19, 2024
Покрај кралицата Елизабета, на фотографијата беа децата на принцот Едвард – Луиз и Џејмс, децата на Зара Тиндал – Лена, Миа и Лукас, децата на принцот Вилијам – Џорџ, Луис и Шарлот и децата на Питер Филипс – Исла и Савана.
Да потсетиме, на почетокот на овој месец, палатата Кенсингтон објави фотографија од Кејт и нејзините деца, но не помина долго пред да се појават првите тврдења дека фотографијата е монтирана. Сè се претвори во огромен скандал, а принцезата мораше да се извини. Таа рече дека повремено, како и многу други „аматери“, сака да „експериментира со уредување“ на фотографии.
