Археолозите открија древна светилка стара околу 1.700 години за време на ископувањата во Ерусалим, објави израелската управа за антиквитети.

„Извонредната изработка на светилката, која беше пронајдена цела, ја прави извонредна и исклучително ретка“, рекол археологот и раководител на ископувањата Мајкл Чернин.

Античкиот керамички артефакт од доцниот римски период е украсен со менора и други еврејски симболи. Тоа дава фасцинантен увид во еврејската култура и религиозниот живот во тоа време.

Светилката ќе биде откриена на изложба во Ерусалим за време на еврејскиот фестивал на светлината Ханука, кој започна во средата навечер.

Инаку, маслената светилка откриена е за време на ископувањата на Маслиновата Гора во Ерусалим. Трагите од саѓи на изливот од светилката покажуваат дека садот се користел за осветлување пред околу 1700 години.