Американската актерка Сидни Свини привлече огромно внимание на премиерата на својот нов филм „Домашната помошничка“ (The Housemaid) во Лос Анџелес. Таа прошета на црвениот тепих во впечатлива бела креација, инспирирана од легендарниот стил на Мерилин Монро, оставајќи малкумина рамнодушни.

Долгиот бел фустан имаше исклучително длабоко деколте, додека наборениот горен дел дополнително ја истакна нејзината фигура. Креацијата потсетува на култниот фустан што Мерилин Монро го носеше во филмот „Чешањето на седмата година“ (The Seven Year Itch), а корсетот во струкот ѝ ја нагласи витката линија и песочната силуета на актерката.

Долниот дел од фустанот е збогатен со волуменозно здолниште, украсено со лесни бели пердуви, кои ѝ дадоа дополнителна драматичност и елеганција на целата појава.

Свини го надополни својот изглед со впечатлива шминка, со акцент на усните, додека нејзината руса коса ѝ беше пуштена и природно обликувана. Од накитот избра минимализам – дијамантски обетки, нараквица и прстен, оставајќи фустанот и силуетата да бидат во прв план.

ФОТО | Jа крена температурата на забавата во Лос Анџелес: Сидни Свини позираше во провокативен готски фустан