Двајца млади ентузијасти, кои живеат во Канада, тргнале на азиска авантура со велосипед, а моментално се во Билеџик, град во северозападна Турција, пренесува „АА“.

Овој необичен пар, со потекло од Филипините, 38-годишната економистка Данг Хуевос и 43-годишниот здравствен работник Дин Кунанан, имаат намера да возат со велосипед околу 15.000 километри, за да стигнат до Непал за време на нивната азиска турнеја.

Тие планираат да пвозат просечно по 60 километри дневно, а навечер да престојуваат во шатор. Во Билеџик биле пречекани од Хакан Јавуз, претставникот на велосипедското друштво „Билеџик“.

Дин Кунанан изјавил за „АА“, дека и претходно имале вакви подвизи, каде патувале низ светот со велосипед, додавајќи дека возеле околу 35 илјади километри во земјите од Латинска Америка. Тој истакнал дека по една година пауза, решиле повторно да се впуштат во нова велосипедска авантура.

„По Турција, сакаме следната година да патуваме низ земјите од Централна Азија и да ја завршиме турнејата во Непал, една од земјите од Јужна Азија. Планиравме да поминеме околу 15 илјади километри за време на нашата авантура“, изјави Кунанан.

Јавуз рекол дека ова не единствен случај, и дека нивното здружение било домаќин на повеќе од 210 странски велосипедисти од 34 земји во последните десет години.

„Од тука го продолжуваат патувањето кон Централна Азија. Овде ги среќаваме и им помагаме да го подигнат кампот“, рече Јавуз.

Младиот Дин, на својот Инстаграм профил повремено објавува фотографии од различни случувања и локации со кои се среќаваат во текот на нивните необични патувања.