Актуелниот светски шампион Макс Ферстапен од „Ред Бул“ ќе стартува од пол-позицијата во Формула 1 трката за Големата награда на Бразил, откако беше најбрз во квалификациите. Холанѓанецот Ферстапен го имаше најбрзиот круг со време од 1:10.727 минути и со тоа стигна до 11 пол-позиција во сезоната.

Второто место во квалификациите го зазеде возачот на „Ферари“, Шарл Леклер, со заостанување од 0,294 секунди. Од третото место ќе стартува Ленс Строл од „Астон Мартин“, кој заостана 0,617 секунди.

Вториот возач на „Астон Мартин“ Фернандо Алонсо беше четврти, а Луис Хамилтон од „Мерцедес“ петти.

Меѓу првите 10 се најдоа и Џорџ Расел („Мерцедес“), Ландо Норис („Мекларен“), Карлос Саинц („Ферари“), Серхио Перез („Ред Бул“) и Оскар Пјастри („Мекларен“).

В сабота од 19.30 часот на програмата е спринтерската трка, а главната трка за Големата награда на Бразил ќе се одржи во недела со почеток од 18.00 часот.