Џорџ Расел најбрз во квалификациите за Големата награда на Британија. Формула 1 возачот на Мерцедес Џорџ Расел победи минатиот викенд во Австрија, додека сега ја освои „пол“ позицијата на ГН на Британија.

Домашниот возач постигна најдобро време во квалификациите на патеката Силверстоун, па во недела од 16 часот ќе има можност да ја оствари втората последователна победа.

Веднаш по него е неговиот клупски колега Луис Хамилтон, додека третото најдобро време го постигна уште еден Британец, Ландо Норис од Мекларен кој не успеа да ги повтори своите тренинзи, кога се чинеше дека е најбрз на патеката.

Зад првите тројца е шампионот Макс Верстапен (Ред Бул), додека во првите 10 се најдоа уште Оскар Пјастри (Мекларен), Нико Хилкенберг (Хас), Карлос Саинц (Ферари), Ленс Строл (Астон Мартин), Александар Албон (Вилијамс) и Фернандо Алонсо (Астон Мартин).

Шарл Леклер не стигна ниту до третата квалификациска сесија со своето Ферари и ќе стартува дури од 11 позиција, додека Серхио Перез (Ред Бул) повторно имаше проблеми и поради излетување од патеката ќе биде претпоследен на стартот на трката.