Швајцарецот е запрен во четвртфиналето на еден од омилените турнири на трева покрај Вимблдон и тоа од младиот канадски тенисер Феликс Оже-Алиасим.

Рожер Федерер кој годинава по пауза од 13 месеци се врати на тениските терени се обидува да ја избруси формата пред настапот на неговиот омилен турнир, Вимблдон, но работите не се одвиваат во посакуваната насока.

Федерер кој на Ролан Гарос одигра два меча на кои победи и потоа се повлече од грен слем турнирот во Париз, предвреме го заврши настапот и на генералната проба пред Вимблдон.
Швајцарецот е елиминиран во четвртфиналето на турнирот во Хале каде ја бранеше титулата од 2019 година и тоа од Феликс Оже-Алиасим во три сета и тоа со 4:6,6:3,6:2.

Оже-Алиасим кој е точно 19 години помлад од Федерер (и двајцата се родени на 8 август) по четврти пат успеа да победи тенисер од Топ 10 на ранг листата, а за прв слави над својот идол.
– Фантастична победа, ова не го очекував. Нормално дека на секој меч доаѓате со желба за победа, но Рожер е мојот идол. Голема чест за мене и што играв против него и што успеац да го победам. Ова е нешто што ќе го паметам целиот живот – изјави Оже-Алиасим кого во полуфиналето го очекува дуел со подобриот од мечот помеѓу Јан Ленард Штруф и Маркос Џајрон.