Во својот осми натпревар сезонава во ЕХФ Европската ракометна лига составот на Еурофарм Пелистер на домашен терен во спортската сала „Боро Чурлевски“ – Битола одигра реми 27:27 со екипата на Агуаш Санташ.

Во текот на првото полувреме македонскиот вицешампион воглавно го имаше водството, во 13 минута имаше највисоки „плус три“ (7:4). Гостите до паузата намалија нешто од негативата, и во вториот дел битолчани имаа само минимална предност од 14:13.

Агуаш Санташ не само што израмни, туку и стекна опасни „плус три“ (21:24) на девет минути до крајот на средбата. Успеаја во клучните моменти да се вратат битолчани, а бодот за поставување на конечниот епилог го обезбеди репрезентативниот пивот Пешевски. Противникот имаше шанса во својот последен напад да дојде до победата, но голманот Кизиќ не дозволи пораз за својата екипа.

За македонскиот вицешампион Радовиќ беше најефикасен со пет голови, а четири запиша Пешевски. Кај Португалците најрасположен беше Да Силва Оливеира со седум погодоци, а два помалку Каладо Рапосо Баптиста.

Во другите два меча Фуксе Берлин славеше со 32:40 на гостувањето кај Бидасоа Ирун, додека Скандерборг Архус со 33:30 го совлада Мотор Запорожје. Моментно по осум кола во групата „Д“ води Фуксе Берлин со максимални 16 бодови, пред Скандерборг Архус со 12, седум има Бидасоа Ирун, четвртопласиран е Еурофарм Пелистер со шест, Агуаш Санташ четири, а Мотор Запорожје три.

Играчите на тренерот Ларс Валтер следниот натпреар во ова натпреварување ќе го имаат на 21 февруари на гостински терен против Фуксе Берлин, а на 28 февруари пред своите навивачи ќе го пречекаат Мотор Запорожје, значаен меч за пласман во следната фаза.