Европската Унија ќе обезбеди дополнителни 300 милиони дози од вакцините на „Фајзер и Бионтек“, најави претседателката на Европската Комисија, Урсула фон дер Лајен. 

Фон дер Лајен на пресконференција во Брисел објави дека 75 милиони дози од оваа вакцина ќе бидат доставени до крајот на вториот квартал на 2021 година, а остатокот во втората половина на оваа година.

– Неодамна ја одобривме вакцината на Модерна. Со двете овластени вакцини, имаме доволно дози за 380 милиони граѓани, што е околу 80 проценти од населението – истакна фон дер Лајен.

Таа изјави дека ЕУ, со договори склучени со шест фармацевтски компании, во моментов има 2,3 милијарди дози нарачани вакцини и потенцираше дека тоа е доволно за ЕУ, но и за нејзините соседи.

– ќе бидеме безбедни само кога сите во ЕУ и соседството ќе имаат пристап до вакцини – нагласи Лајен.