Испораката на топлинска енергија е нормализирана за најголем дел од потрошувачите во општините Центар, Аеродром, Кисела Вода и Автокоманда, по денешниот прекин предизвикан од дефект на дистрибутивната мрежа на булеварот „Крсте Мисирков“, соопшти попладнево ЕСМ.

Од компанијата информираат дека екипите на ЕСМ Дистрибуција и понатаму се на терен и работат на целосно отстранување на дефектот, со цел воспоставување на редовна испорака на топлинска енергија за сите потрошувачи.

Како што се наведува во соопштението, поради дефектот без парно останале повеќе институции и објекти, меѓу кои Институтот за национална историја, Институтот за македонска литература, Основните судови 1 и 2, Кривичниот и Апелациониот суд, МРТВ, МКЦ, МАНУ, факултетите и Ректоратот на УКИМ, како и повеќе образовни, културни и верски установи во централното градско подрачје.

Од ЕСМ Снабдување со топлина потсетуваат дека за дополнителни информации, потрошувачите можат да се обратат во Центарот за грижа за потрошувачи на телефонските броеви (02) 3076 200 и 075 400 100.