ЕП, Дабевска: Се надевам дека Македонија ќе биде подобра на следните натпреварувања
Македонската женска ракометна репрезентација со три порази во групата „Ц“ од прелиминарната фаза го заврши настапот на Европското првенство.
На последниот трет дуел кој решаваше за третото место кое исто така водеше во главната фаза, избраничките на селектор Љубомир Савевски загубија од Романија (23:31) во СЦ „Борис Трајковски“ – Скопје.
Пивотот на нашата сениорска селекција, Сања Дабевска беше најефикасна против Романките со седум голови.
Ракометарката на хрватскиот клуб Локомотива Загреб се надева дека Македонија ќе биде подобра во следните натпреварувања.
– Беше тежок натпревар, во првото полувреме дадовме сè од себе, но во вториот дел „застанавме“ и малку се откажавме. Нашиот тим е многу млад и искуството на Романија преовладуваше. Се надевам дека Македонија ќе биде сè подобра и подобра на следните натпреварувања – рече Дабевска.