Инсулинската резистенција е состојба во која на телото му е потребен повеќе инсулин за да го постигне истиот ефект, обjаснила за „Дејли експрес“ д-р Џенифер Ченг, раководителка на ендокринологијата во Медицинскиот центар на Универзитетот Хекенсак Меридан Џерси шор.

Инсулинот е хормон чија главна улога е да ги намали нивоата на гликоза во крвта и да ѝ овозможи да влезе во клетките, каде што се користи како извор на енергија.

– Кога во телото има повеќе масно ткиво, поголема е и инсулинска резистенција – додала д-р Ченг.

Оваа состојба го зголемува ризикот од развој на дијабетес тип 2, дебелина, висок крвен притисок и синдром на полицистични јај;ници (ПЦОС), а ако веќе проблемите се присутни, може дополнително да ги отежни за контрола.

Иако најчестата храна што треба да се избегнува – како што се слатките, газираните пијалоци и белиот леб – постојат и некои што можат да помогнат во стабилизирањето на шеќерот во крвта. Зелениот чај се споменува сè повеќе.

Според зборовите на д-р Ченг, некои истражувања сугерираат дека зелениот чај може да има корисни ефекти врз регулирањето на гликозата и инсулинската резистенција, иако се потребни пообемни истражувања.

Зелениот чај содржи активно соединение наречено епигалокатехин-3-O-(3-O-метил) галат, кое може да влијае на таканаречените цревни транспортери на гликоза (ГЛУТ).

– Ова соединение помага во намалувањето на апсорпцијата на шеќер во цревата – објаснила докторката.

Покрај тоа, зелениот чај може да им помогне на мускулите поефикасно да ја користат гликозата од крвта, што придонесува за постабилно ниво на шеќер во крвта.

Некои студии покажаа и намалување на инсулинската резистенција преку мерење на индексот HOMA-IR, кој се базира на нивоата на гликоза и инсулин на гладно. Сепак, експертите предупредуваат дека резултатите во моментов се недоследни и дека зелениот чај не треба да се гледа како замена за терапија.

Кога е најдобро време за пиење зелен чај?

Не постои универзално „најдобро време“ за пиење зелен чај. Пиењето на празен стомак може да помогне во подобра апсорпција на активните состојки, додека пиењето со оброк може да го подобри искористувањето на одредени хранливи материи, како што е железото.

Поважно од времето е количината. Некои студии сугерираат дека за забележителни ефекти, треба да пиете четири до шест чаши дневно, редовно, во подолг временски период.

Како правилно да го приготвите зелениот чај?

За да бидете сигурни дека зелениот чај навистина има позитивен ефект врз шеќерот во крвта, д-р Ченг советува:

– Изберете незасладен зелен чај
– Не додавајте шеќер
– Оставете го чајот да отстои околу три минути, наместо да го потопувате долго време
– Размислете за чај од мача или чај во прав, кој може да содржи повеќе антиоксиданси

Иако може да биде корисен додаток, зелениот чај не е замена за здрави навики.

– Исхраната, редовната физичка активност и промените во животниот стил имаат многу поголемо влијание врз контролата на шеќерот во крвта – нагласила д-р Ченг.

За превенција и подобра контрола на дијабетесот, препорачаните мерки вклучуваат најмалку 150 минути умерена физичка активност неделно, контрола на внесот на јаглехидрати, зголемување на внесот на влакна и – можеби најважно – управување со стресот.

– Стресот го стимулира ослободувањето на хормони како кортизол, што може да го зголеми шеќерот во крвта – заклучила докторката.

Техники како длабоко дишење, медитација, вежбање и активни хобија можат да имаат големо влијание врз вашето здравје – и нивото на шеќер во крвта.