Актерката Емили Блант откри дека одбила да користи вештачка интелигенција при снимањето на новиот научнофантастичен филм на Стивен Спилберг, „Денот на откривањето“ (Disclosure Day), бидејќи, како што вели, оваа технологија ја плаши.

Во гостување во емисијата „Жешките“ (Hot Ones), Блант зборуваше за една од клучните сцени во филмот, во која нејзиниот лик зборува на нечовечки јазик.

„Тоа е сцена снимана во еден кадар, долга четири минути, во која мојот лик постепено почнува да се распаѓа. Постојат различни начини да се направи тоа. Можевме да одиме по патот на вештачката интелигенција, а тоа малку ме плаши“, изјави актерката.

Наместо тоа, таа решила сама да ги сними сите необични звуци потребни за сцената.

„Предложив да влезам во студио и да снимиме цел спектар чудни звуци. Правев кликнувања, потпевнувања, согласки, необични звуци на дишење. Дизајнерот на звукот потоа ги искористи и го создаде тој необичен ефект“, објасни Блант.

Филмот „Денот на откривањето“ пристигнува во кината на 12 јуни и ја следи приказната на телевизиска метеорологинка од Канзас Сити, која за време на пренос во живо е преземена од мистериозна вонземска сила.

Покрај Блант, во филмот играат Џош О’Конор, Колин Ферт, Ив Хјусон, Колман Доминго, Вајат Расел и Хенри Лојд-Хјуз.

Во истото интервју, актерката откри и дека нејзиниот омилен филм на сите времиња е култниот „Ајкулата“ (Jaws) на Спилберг.

„Многу луѓе го гледале како деца, но кога ќе го гледате како возрасни, добива сосема поинаква димензија. Во сите филмови на Стивен има прекрасна човечност и емоционална длабочина. Затоа ‘Ајкула’ засекогаш ќе бидат мојот омилен филм“, рече таа.

Блант откри и кое било најстрашното искуство во нејзината кариера. Според неа, тоа било за време на снимањето на „Враќањето на Мери Попинс“ (Mary Poppins Returns) од 2018 година.

„Бев преплашена. Издржав само три снимања пред да кажам дека ми е доста. Се кревавме сè повисоко и повисоко, а единствено се надевав дека жиците ќе издржат. Тоа беше моментот кога најмногу се исплашив на снимање“, призна актерката.