На четвртиот по ред состанок, Европската централна банка ги остави своите клучни каматни стапки непроменети, потврдувајќи истовремено дека на среден рок, инфлацијата во еврозоната треба да се стабилизира на целното ниво од 2%, објави БНР, пренесува Сега.бг.њус.

Каматните стапки на депозитниот систем, главните операции за рефинансирање и маргиналниот систем за кредитирање остануваат непроменети – на нивоа од 2,00%, 2,15% и 2,40%, соодветно, соопшти ЕЦБ.

Централната банка ги објави и новите прогнози на експертите на Евросистемот, при што економскиот раст во оваа и следните две години е малку ревидиран нагоре, главно со оглед на подобрата домашна побарувачка, како и оние за инфлацијата во 2026 година поради очекуваниот побавен пад на инфлацијата на услугите.

Се очекува вкупната инфлација да изнесува во просек 2,1% во 2025 година, потоа да се забави на 1,9% во 2026 година и на 1,8% во 2027 година, пред да се стабилизира на ценовно ниво од 2% во 2028 година. Растот на БДП во еврозоната, исто така, се очекува да биде посилен од проектираниот во септемвриските прогнози на ЕЦБ, при што растот е ревидиран нагоре на 1,4% оваа година, 1,2% во 2026 година и 1,4% во 2027 година, додека економскиот раст се очекува да достигне 1,4% во 2028 година.

Управниот совет на ЕЦБ ја повтори својата посветеност да обезбеди инфлацијата да остане стабилна на целта од 2% на среден рок.