За време на своето обраќање пред Обединетите нации, британскиот премиер Борис Џонсон ги повика светските лидери да ја искористат својата моќ и да се справат со климатските промени и нагласи дека е време човештвото да покаже зрелост и одговорност во ова прашање.

Пред важната климатска конференција во Глазгов, која започнува на 31-ви октомври, Џонсон пред Генералното собрание на ОН рече дека светските лидери имаат огромна моќ за да ги променат работите на подобро и да ја спасат планетата од катастрофалните последици од климатските промени, пренесува Гардијан.

Конференцијата на ОН КоП26 има за цел да поттикне многу поамбициозни глобални акции за спас од климатските промени и да обезбеди пари за нивна имплементација, во време кога научниците предупредуваат дека глобалното затоплување е многу близу до излегување од контрола.

„Мораме да покажеме дека сме способни да учиме и созреваме и конечно да преземеме одговорност за уништувањето што го нанесуваме, не само на нашата планета, туку и на самите себе. Време е човештвото да созрее“, рече Џонсон.

Тој го заврши своето обраќање со шега и рече дека популарната жаба Кермит, лик од ТВ -шоуто „Мапет шоу“, згрешил кога пеел „Не е лесно да се биде зелен“.

„Жабата Кермит греши. Лесно е да се биде зелен “. заклучи британскиот премиер.