Додик му се заблагодари на Трамп за укинувањето на санкциите, па удри со дрвја и камења по Обама и Бајден
По повеќе од осум години, американските власти ги укинаа санкциите кон Милорад Додик, неговото семејство и дел од функционерите на Република Српска. Одлуката ја донесе Канцеларијата за контрола на странски средства (OFAC) при Министерството за финансии на САД, а Додик веднаш реагираше на социјалната мрежа „X“, изразувајќи благодарност до американскиот претседател Доналд Трамп и упатувајќи критики кон администрациите на Барак Обама и на Џозеф Бајден.
Препорачано
„Благодарен сум на американскиот претседател Доналд Трамп и неговите соработници. Голема неправда беше направена кон Република Српска, нејзините претставници и членовите на семејствата – неправда од страна на администрациите на Барак Обама и Џозеф Бајден. Одлуката за воведување санкции не беше коректна, а одлуката за нивно укинување не е само правна, туку и морална рехабилитација на вистината за Република Српска и за сите што ѝ служат чесно“, напиша Додик.
Тој додаде дека „повторно се покажало дека сè што било изговорено против Република Српска било лага и пропаганда, врз кои бил изграден голем неред што го создал Кристијан Шмит – неред што сега мора да се исчисти.
I am grateful to President Donald Trump @realDonaldTrump and his associates for correcting a grave injustice inflicted upon Republika Srpska, its representatives, and their families – an injustice perpetrated by the Obama and Biden administrations.
The decision to lift the…
— Милорад Додик (@MiloradDodik) October 29, 2025
Додик им порача и на своите критичари:
„Оние што овие години ликуваа и веруваа во туѓи лаги можам да им простам сè, освен годините што ги изгубивме затоа што веруваа дека Република Српска ќе падне. Денес е јасно: никогаш нема да падне“.
Да потсетиме, Милорад Додик беше под американски санкции од 2017 година поради, како што тогаш наведе американското Министерство за финансии, „опструкција на Дејтонскиот мировен договор и корупција“.
Покрај оваа одлука, OFAC објави и ново Општо одобрение број 129, кое се однесува на трансакции поврзани со компаниите Rosneft Deutschland GmbH и RN Refining & Marketing GmbH, како и изменето често поставувано прашање (FAQ 1216).
